గోడౌన్‌లో బస్తాలకొద్ది కరెన్సీ నోట్లు.. భారీ స్కామ్! మోసగాళ్లకు అల్లు అర్జున్ సపోర్ట్..

గత కొంతకాలంగా పరాజయాలతో సతమతమవుతున్న మంచు విష్ణు.. భారీ స్కామ్‌ని ప్రేక్షకుల ముందుకు తీసుకొచ్చి థ్రిల్ చేయబోతున్నారు. ‘మోసగాళ్లు’ పేరుతో విలక్షణ కథను రూపొందిస్తున్నారు. ఈ మూవీలో తానే హీరోగా నటిస్తూ నిర్మాణ బాధ్యతలు కూడా చేపట్టారు మంచు విష్ణు. చరిత్రలో అతిపెద్ద ఐటీ కుంభకోణాల్లో ఒకటిగా నిలిచిన స్కామ్ మిస్టరీని కథాంశంగా తీసుకొని హాలీవుడ్-ఇండియన్ మూవీగా ఈ సినిమాను రూపొందిస్తుండటం విశేషం. ఇప్పటికే విడుదల చేసిన ఈ మూవీ పోస్టర్స్ మోసగాళ్లపై అంచనాలు నెలకొల్పగా.. తాజాగా టీజర్ రిలీజ్ చేసి ఆ అంచనాలకు రెక్కలు కట్టింది చిత్రయూనిట్.

నేడు (అక్టోబర్ 3) కొద్దిసేపటి క్రితం అల్లు అర్జున్ చేతుల మీదుగా ‘మోసగాళ్లు’ టీజర్ రిలీజ్ చేశారు. ఈ మేరకు ఈ టీజర్‌ని తన ట్విట్టర్ ఖాతా ద్వారా షేర్ చేసిన బన్నీ.. మంచు విష్ణు తన చిన్ననాటి స్నేహితుడని తెలుపుతూ చిత్రయూనిట్ మొత్తానికి ఆల్ ది బెస్ట్ చెప్పారు. ఇకపోతే కేవలం 31 సెకనుల నిడివితోనే విడుదలైన ఈ టీజర్ సినిమాపై ఆసక్తి రేకెత్తిస్తోంది. అమెరికా ప్రెసిడెంట్ ట్రంప్ ఉపన్యాసంతో మొదలుపెట్టి.. గోడౌన్‌లో బస్తాలకొద్ది కరెన్సీ నోట్లు చూపిస్తూ భారీ స్కామ్ నేపథ్యంలో ఈ సినిమా ఉంటుందని ఈ టీజర్ ద్వారా చెప్పారు మేకర్స్.