టిపిసిసి చీఫ్‌ రేవంత్‌ రెడ్డి అరెస్ట్‌

టిపిసిసి చీఫ్‌, కాంగ్రెస్‌ ఎంపీ రేవంత్‌ రెడ్డి జూబ్లిహిల్స్‌లోని తన నివాసం నుంచి ఎర్రవల్లికి బయల్దేరుతుండగా సోమవారం పోలీసులు అరెస్ట్‌ చేశారు. ఈ క్రమంలో పోలీసులు-కాంగ్రెస్‌ కార్యకర్తల మధ్య తీవ్ర వాగ్వాదం, తోపులాట చోటుచేసుకుంది. దీంతో రేవంత్‌ ఇంటి వద్ద ఉద్రిక్త పరిస్థితులు నెలకొన్నాయి.ఉదయం నుంచే ఇంటి చుట్టూ పోలీసులు పహారా కాస్తూ.. ఇంటి నుంచి ఎటు వైపు నుంచి బయటికి వచ్చినా అడ్డుకుని అరెస్ట్‌ చేయాలని ముందస్తు వ్యూహంతో పోలీసులు ఉన్నారు. ఆయన బయటికి రాగానే అరెస్ట్‌ చేశారు. అయితే ఆయన్ను ఎక్కడికి తరలించారన్న విషయం మాత్రం తెలియరాలేదు. ఉదయం నుంచి రేవంత్‌ నివాసంతో పాటు పలువురు కాంగ్రెస్‌ నేతల ఇంటి వద్ద ఉద్రిక్త పరిస్థితి నెలకొంది. సోమవారం తెల్లవారుఝామునుంచే పలువురు కాంగ్రెస్‌ నేతలను పోలీసులు ముందస్తుగా హౌస్‌ అరెస్ట్‌లు చేశారు. అయితే.. మధ్యాహ్నం రెండు గంటలు కావస్తుండటంతో రేవంత్‌ ఇంటికి భారీగా పోలీసులు చేరుకున్నారు.