తేనె vs బెల్లం.. బరువు తగ్గేందుకు, డయాబెటిక్స్‌కు ఏది ఉత్తమం?

మన భారతీయ వంటకాల్లో ఎక్కువగా బెల్లాన్నే ఉపయోగిస్తారనే సంగతి తెలిసిందే. మన పూర్వికులు కూడా చక్కెరకు బదులుగా బెల్లాన్నే వాడేవారు. అందుకే.. అప్పటివారు ఇప్పటికీ స్ట్రాంగ్‌గా ఉంటున్నారు. బెల్లంలో పోటాషియం, మెగ్నీషియం, విటమిన్ B1, B6తోపాటు విటమిన్-C కూడా ఉంటుంది. కడుపులోని విషతుల్యాలను బయటకు పంపేసే మంచి ఫైబర్ కూడా ఇందులో ఉంది. దీనివల్ల జీర్ణ వ్యవస్థ మెరుగ్గా పనిచేస్తుంది. ఆయుర్వేద వైద్యులు.. ఒక కప్పు వెచ్చని నీటిలో బెల్లం కలుపుకుని తాగితే మంచిదని చెబుతుంటారు. కొంతమంది భోజన తర్వాత కొన్ని బెల్లం నీళ్లు తాగితే ఆహారం త్వరగా జీర్ణమవుతుందని చెబుతుంటారు. బెల్లంలో ఉండే ఫినోలిక్ సమ్మేళనాలు ఆక్సిడేటివ్ స్ట్రెస్‌తో పోరాడతాయి. బెల్లం శరీరానికి రోగ నిరోధక శక్తిని సైతం అందిస్తుంది.

తేనె సహజ సిద్ధంగా లభిస్తుంది. చక్కెర గ్లూకోజ్, ఫ్రక్టోజ్‌లు 50-50 శాతం ఉంటాయి. అయితే, తెనెలో 30 శాతం గ్లూకోజ్, 40 శాతం ఫ్రక్టోజ్ మాత్రమే ఉంటాయి. వీటితోపాటు మరికొన్ని చక్కెర అణువులు ఇందులో ఉంటాయి. అవి త్వరగా జీర్ణమవుతాయి. పైగా అవి శరీరంలో కొవ్వులుగా పేరుకుపోవు. కాబట్టి.. శరీరానికి తేనె ఎంతో మంచిది. పైగా ఇది రోగ నిరోధశక్తిని పెంపొందించే ఇమ్మునిటీ బూస్టర్‌గానూ పనిచేస్తుంది. శరీరానికి కావల్సిన ముఖ్యమైన మినరల్స్, అమినో యాసిడ్స్, న్యూట్రియెంట్స్, యాంటీఆక్సిడెంట్స్‌ను తేనె అందిస్తుంది. వేడి నీటిలో తేనె వేసుకుని తాగితే జీవక్రియ మెరుగుపరుస్తుంది. పైగా బరువును సైతం తగ్గిస్తుంది. అయితే, తేనెను మోతాదుకు మించి తీసుకోకూడదు. ఎందుకంటే.. ఒక టేబుల్ స్పూన్ తేనెలో 60 నుంచి 64 కెలోరీలు ఉంటాయి. ఇది చక్కెరలో ఉండే కెలోరీలతో సమానం.