బరువు తగ్గడానికి అన్నం మంచిదా.. చపాతీ మంచిదా..

ప్రస్తుత కాలంలో అందరు ఎక్కువుగా జంక్ ఫుడ్స్ కి ఎక్కువగా అలవాటు పడిపోయారు. ఇది బరువు పెరగటానికి ప్రధాన కారణం, మరియు పని ఒత్తిడి, నిద్రలేమి ఇలా అనేక కారణాల వల్ల కూడా బరువు పెరుగుతున్నారు. బరువు తగ్గాలనే ఆలోచన వచ్చిన వెంటనే మొదటిగా చేసే పని అన్నం తినడం మానేసి చపాతీ తింటారు. అయితే ఆరోగ్యానికి అన్నం, చపాతీ రెండింటిలో ఏది మంచిది..

ఆహారంలో కార్బోహైడ్రేట్స్‌ లేకపోతే త్వరగా బరువు తగ్గుతారు. చాలా మంది బరువు తగ్గటానికి వారి ఆహారంలో కార్బోహైడ్రేట్స్‌ని తగ్గిస్తారు. ఏదేమైనా భారతీయ ఆహారంలో, ప్రధాన పిండి పదార్ధాలు బియ్యం, గోధుమలు. అన్నం, చపాతీ అనేవి భారతీయుల డైట్‌లో భాగమైపోయాయి. చాలా వరకూ మన ఆహారాలు గోధుమ ఆధారిత, బియ్యం ఆధారితమైనవి కాబట్టి, బియ్యం, చపాతీలను పూర్తిగా మానేయ్యడం సరైంది కాదు.

బరువు తగ్గటానికి ఎక్కువగా ఉపయోగించే ఆహారంలో చపాతీ ఒకటి. అయితే చాలా మంది అన్నానికి బదులుగా చపాతీ తీసుకుంటారు. అయితే చాలా మంది తెలుసుకోవాల్సిన విషయం ఏంటంటే బరువు తగ్గటానికి అన్నానికి బదులుగా చపాతీ తినడం మంచిదే. అయితే వాటిని ఎంత పరిమాణంలో తీసుకుంటున్నాం అనేది కూడా ముఖ్యమే. చపాతీలని ఎక్కువగా కూడా తినకూడదు. బరువు తగ్గటానికి రోజుకి గరిష్టంగా నాలుగు చపాతీలు తినడం మంచిది.

గోధుమలో ఫైబర్‌ ఎక్కువగా ఉండడం వల్ల నిదానంగా జీర్ణమవుతూ కార్బొహైడ్రేట్లు ఒక్కసారిగా రక్తంలో కలవకుండా ఉంటాయి. అందుకే అన్నం కంటే చపాతీలు ఆరోగ్యానికి మంచివి. చాలామంది రాత్రి పూట చపాతీ ఆరోగ్యానికి మంచిదని అంటారు. అయితే, ఒకవేళ రాత్రి మీ ఆహారంగా చపాతీ తినాలనుకుంటే, రాత్రి 7:30 గంటలకు ముందు తినేయడం మంచిదని చెబుతున్నారు వైద్యులు . అయితే మీ శరీరానికి ఏది బాగా సరిపోతుందో ముందుగా మీరు తెలుసుకోవడం అవసరం.