ఏపీలో మహిళలపై వరుస అఘాయిత్యాలు జరుగుతున్నాయని 120 రోజుల్లో 110 ఘటనలు జరిగాయని మాజీ మంత్రి ఆర్కే రోజా అన్నారు. స్కూల్ నుంచి వస్తున్న అమ్మాయికి మత్తు మందు ఇచ్చి అత్యాచారం చేశారని ఆమె తెలిపారు. డిప్యూటీ సీఎం పవన్ కల్యాణ్ ఎక్కడికి పోయారంటూ ప్రశ్నించారు. రేప్ జరిగింది అన్న విషయాన్ని కప్పిపెట్టడానికి అనేక హాస్పిటల్స్‌కి తిప్పారని ఆరోపించారు. ప్రభుత్వం నుంచి ఎస్పీకి ఎంత ఒత్తిళ్లు వస్తున్నాయో ఆయన మాటలను బట్టి అర్థం అవుతోందన్నారు. హోం మంత్రి సరిగ్గా పనిచేయలేదని పవన్ కల్యాణ్ మాట్లాడడం వెనుక కారణాలు ఏంటని ఆమె ప్రశ్నించారు.
ఒక దళిత హోంమంత్రిపై నిందలు వేసి చేతులు దులుపుకుంటున్నారని వ్యాఖ్యానించారు. లోకేష్‌కి ఎవరు నచ్చలేదో వారిపై రెడ్ బుక్ రాజ్యాంగం రుద్దుతారని నేరుగా సీఎం, మంత్రి లోకేష్ డీజీపీ నుంచి కింద స్థాయి సిబ్బంది వరకు బదిలీలు చేసుకున్నారని అన్నారు. వారికి నచ్చిన వాళ్ళను వేసుకొని ఘటనలకు పాల్పడ్డ వ్యక్తులను ఎందుకు కాపాడే ప్రయత్నం చేస్తున్నారని ప్రశ్నించారు. యూపీ సీఎంలా పనిచేయాలి అని అంటున్న పవన్ కల్యాణ్ యోగిలా పనిచేయమని చంద్రబాబుకు పవన్ చెప్పాలన్నారు. అధికారం చేతిలో ఉన్న వాళ్ళు తప్పులు జరగకుండా చూడాలన్నారు.
