నేనింకా కోలుకోలేదు అని క్లారిటీగా చెప్పేశారు రకుల్‌ ప్రీత్‌సింగ్‌. ఇంకో రెండు వారాలు పూర్తయ్యాకే మామూలు మనిషినయ్యే అవకాశం ఉందన్నారు. అప్పుడెప్పుడో నడుం పట్టేసిందన్న రకుల్‌ ఇంకా ఆ పెయిన్‌తోనే ఇబ్బంది పడుతున్నారా? ఇంకేమైనా కాంప్లికేషన్స్ వచ్చాయా? అక్టోబర్‌ 5 నేను నా జీవితంలో ఏమాత్రం ఊహించని రోజు. గుర్తుపెట్టుకోవడానికి కూడా ఇష్టపడటం లేదు అని అంటున్నారు రకుల్‌ ప్రీత్‌ సింగ్‌.ఆ రోజు ఉదయం దాదాపు 80 కిలోల వెయిట్‌ ఎత్తారట రకుల్‌. అప్పుడే వెన్ను నొప్పి మొదలైనా పట్టించుకోకుండా వర్కవుట్స్ కంటిన్యూ చేసి షూటింగ్‌కి వెళ్లారు. ఆ సాయంత్రం ఇంటికి వచ్చే సరికి విపరీతమైన వెన్ను నొప్పి అదే తగ్గుతుందిలే అని అశ్రద్ధ చేశారు.
ఓ ఐదు రోజులు గడిచే సరికి పెయిన్‌ పెరిగి, బీపీ డౌన్‌ అయింది. పది రోజుల పాటు హాస్పిటల్‌లో ఉన్నారు రకుల్‌. ఆ ట్రీట్‌మెంట్లో ఉండగానే ఆమె బర్త్ డే వచ్చింది. ఎన్నెన్నో సర్‌ప్రైజ్‌లు ప్లాన్‌ చేశారు భర్త జాకీ భగ్నాని. కానీ, పార్టిసిపేట్‌ చేయలేకపోయారు రకుల్‌. కాసేపు ఒక్క చోట కూర్చోకుండా చలాకీగా తిరిగే రకుల్‌, అన్ని రోజులు బెడ్‌ రెస్ట్ తీసుకోవడాన్ని నరకంగా ఫీలయ్యారు. ఏదీ మొండిగా చేయకూడదన్నది నాకు లైఫ్‌ నేర్పించిన పాఠం అంటారు రకుల్‌. అంతే కాదు, ఇంకో రెండు వారాలు రెస్ట్ తీసుకుంటేగానీ, తాను ఎంత మేర కోలుకున్నాననే విషయం మీద అవగాహన రావడం కష్టం అంటున్నారు. ఈ మధ్య ఫ్లైట్‌ ఎక్కుతుంటే కన్నీళ్లు వచ్చేశాయని, జీవితం క్షణికం అనే మాటకు అర్థం తెలిసిందని చెప్పారు రకుల్‌.
