టాలీవుడ్ స్టార్ డైరెక్టర్‌ రామ్‌గోపాల్‌వర్మకు పోలీసులు బిగ్ షాక్ ఇచ్చారు. ఒంగోలు పోలీసులు హైదరాబాద్‌ చేరుకుని ఆయనకు నోటీసులు అందించారు. ఈ ఏడాది ఏపీ అసెంబ్లీ ఎన్నికలకు ముందు ‘వ్యూహం’ సినిమా ప్రమోషన్‌ సమయంలో అప్పటి ప్రతిపక్ష నేత చంద్రబాబు, నారా లోకేశ్ జనసేన అధినేత పవన్‌ కళ్యాణ్‌ వ్యక్తిత్వాలను కించపరిచేలా వర్మ ఎక్స్‌లో పోస్టులు చేశారు.
ఈ నేపథ్యంలో ప్రకాశం జిల్లా మద్దిపాడు పోలీస్ స్టేషన్‌లో కేసు నమోదైంది. ఈ మేరకు విచారణకు హాజరు కావాలంటూ ఆయనకు పోలీసులు నోటీసులు జారీ చేశారు. వ్యక్తిగతంగా వాటిని అందజేసేందుకు ఎస్సై శివరామయ్య ఆధ్వర్యంలోని బృందం మంగళవారం రాత్రి హైదరాబాద్‌కు బయలుదేరింది. బుధవారం నోటీసులు అందజేసే అవకాశం ఉంది. ఒంగోలు గ్రామీణ సీఐ ఎన్‌.శ్రీకాంత్‌ ఈ విషయాన్ని ధ్రువీకరించారు.
